ليه الدكاترة عاملين دوشة..البلد مش ناقصة

ليه الدكاترة عاملين دوشة..البلد مش ناقصة
بقلم الدكتورة Shaimaa Abady ليه الدكاترة عاملين دوشة..البلد مش ناقصة أكيد كتير فكر كدة..ويمكن حضرتك فكرت كدة..ويمكن كمان دكاترة تانيين فكرو كدة بس أنا مفكرتش كدة..انا افتكرت وشوش العيانين اللي ماتو.. فاكرة كل اسم، كل مريض صرخاته رجت الحيطان..فاكرة كل ...عين غمضت للابد بين ايديا.. فاكرة دموعي وانا بودعهم، وبقول يارب لحد امتى ؟ فاكرة اني قلتلهم سامحوني، ، بحاول بس صوتي مش بيوصل، ومكاني اضعف من أنه ياثر النهاردة افتكرت غزالة..اللي الاهمال في المستشفى كان هيضيع حياتها وجت كشفت مرتين وكل مرة يخرجوها متتحجزش ولما اتحجزت كانت كل حاجة بتتأخر....وفيه حاجات بفلوس واهلا ممعهومش في الاخر طلع عندها سرطان ..على ما اتشخصت..كانت خسرت وقت طويل قوي.. غزالة دي..اصغر مني...ياترى لسة عايشة؟..أتمنى ذلك.. النهاردة افتكرت عم عز..كنت مسمياه كدة..اللي فضل في المستشفى أكتر من شهر ونص.. لن أنسى ما حييت..عذابه اللي اتعذبه ..لن أنسى كلامه في أخر ايام حياته وهو بيقولى ليه المنظومة العلاجية بايظة كدة. مش هنسى البهدلة اللي اتبهدلها..مش هنسى اني كنت بلف في كل قسم اخلص ورقه وكل مرة العملية تتعطل لسبب غبي.. مرة عشان الاوراق ناقصة حاجة..مرة عشان مفيش حد فاضي يعمله العمللية..مرة عشان مفيش تمريض يشتغل في اوضة العمليات بعد ما اتفتحت وكل مرة يتنقل من القسم لتحت ويرجع يطلع تاني..وكان بيحاول يخبي لو تعبان عشان يعملووله العملية ويخلصوه مش هنسى أهله ..مش هنسى انه اتظلم وانا شاهدة على ظلمه ومش مسامحه فيه.. وفي اخر ايامه..حالته تدهورت بعد ماكان المفروض يتحسن..وفي اخر ايامه اتظلم برضه..لحد ما مات واستريح من البلد الظالمة دي.. النهاردة افتكرت عبير..اللي اتبهدلت بين مستشفى الشاطبي والميري.. مش هنسى كل العقد اللي كانت قصادنا عشان تتنقل العناية المركزة..وكل مرة المووضع يبوظ.. مش هنسى الدكتور الرائع صاحب الضمير الحي والمعلم العظيم اللي وقف في العنبر وهدد قسم العناية انه لو مأخدهاش هيقلب الدنيا كلها عليها.. وهيقدم فيهم بلاغ..وفعلا اتنقلت بس للاسف كان الوقت فات ..يوم ما اتنقلت العناية ..ماتت هناك مش هنسى لما كانت في الغيبوبة، وأمها بتقولي هي هتصحى امتى؟ يومها خرجت بلعن الطب والمستشفى والبلد اللي عاملة فينا كدة عبير كانت صغيرة برضه...الله يرحمها افتكرت لما كنا في نباطشات الطوارئ وكل حاجة مش موجودة والعلاج بيخلص والاجهزة بتبوظ..والناس بتموت..ومش عارفين نعمل ايه والاسماء في ذاكرتي كتير، من عمر سنة واحدة اشتغلتها في مستشفيات الجامعة، اللي بيتصرف عليها اكتر من مستشفيات وزارة الصحة بكتير ...كنت أخدت عهد على نفسي اني إما أسيب الطب أو اكمل فيه بس برأس مرفوعة وآخد حق كل عيان مات ظلم وكل عيان اتعذب بدون وجه حق.. ولما مكنش ليا صوت، كان كلامي بيروح في الهواء ، بس النهاردة بقينا كتير ، وهنطالب بحقنا اننا نتعلم صح..هنطالب يبقى دخلنا كويس عشان منبقاش مخيرين نجري ورا اكل العيش ليل نهار ولا نذاكر ونتعلم عشان نبقى أحسن هنطالب ان ميزانية الصحة تترفع عشان لو في يوم اهلي واهلك اضطرو يروحو هناك مييحصلهمش اللي كنت بشوفه عشان لما الايام تدور علينا ونبقى مرضى نلاقي علاج كويس..عشان كل عيان رفع ايده ودعالي وقالي ربنا يعلي مراتبك وتبقى في صفنا دعوته تستجاب عشان نظرة الذل ودموع القهر اليل شفتها في عيون العيانين مبقتش عايزة اشوفها تاني وعشان كل حرامي في القطاع الصحي لازم يتعرف وكل ملفات الفساد لازم تتفتح..واللي سرقو اعمار الناس مش هنسيبهم ينجو بيها عشان كدة هنكافح..وهنحتج..وهنعمل اضراب....وهنقولها بأعلى صوت.. من النهاردة محدش هيتعذب عشان الصحة تاني..يانعيش بكرامتنا.يانموت بكرامتنا مشاهدة المزيد

Sent from my BlackBerry® wireless handheld